Teks Ceramah Sunda ( Ngadegkeun Sholat )

اَلسّلَامُ عَلَيْكُمْ وَرَحْمَةُ اللهِ وَبَرَكَاتُهُ

اَلْحَمْدُ لِلهِ رَبِّ الْعَالَمِيْنَ. وَالْعَاقِبَةُ لِلْمُتَّقِيْنَ وَلَا عُدْوَانَ إِلَّا عَلَى الظٰلِمِيِنَ. اَللٰهُمَّ صَلِّي عَلٰى سَيِّدِنَا مُحَمَّد وَعَلٰى اٰلِهِ وَصْحَابِهِ وَمَنْ تَبِعَهُ إلٰى يَوْمِ الدِّيْن ( اَمَّا بَعْدُ(

Sateuacan nyanggakeun salam Tahiyyatul islam,puji miwah syukur mangga urang sami-sami sanggakeun ka dzat Allah Warobbun Ghifur nu mana urang sadayana tiasa riung mungpulung patepang wajah pamprok jonghok dina ieu patempatan mubarokah.

Sholawat kalih salamna mugia tetep dilimpah curahkeun ka junjungan urang sadayana  nyatana kanjeng Nabi Muhammad SAW. Ka kulawargi na, ka para shohabatna, ka para tanbiin atba’utthabiin oge mudah-mudahan dugi ka urang sadayana salaku umat na.

Santriyin miwah santriyat rohimakumulloh, insyaalloh dina denget nu ayeuna abdi bade ngadugikeun hiji materi perkawis “Wajibna Ngdegkeun Sholat”.

Sakumaha nu parantos ka uninga ku urang sadayana yen ibadah anu pokok anu wajib ku urang dilakonan teh nyaeta ibadah Sholat. Naon ari ngaran sholat teh?

اَلصَّلَاةُ هِيَ اَقْوَلٌ وَاَفْعَلٌ مُفْتَتَحَةٌ بِالتَّكْبِيْرِ وَمُخْتَتَمَةٌ بِالتَّسْلِيْمِ

“Sholat teh nyaeta hiji pagawean nu di mimitian ku Takbirotul Ihrom sarta diakhiran ku bacaan salam”

Santriyin miwah santriyat Rohimakumulloh, tah berarti urang sadayana teu kenging ngantunkeun sholat sanajan sawaktu oge. Ulah siga nadzoman si kabayan:

 Barang datang waktu shubuh urang sadayana kalahka tunduh, tuh tinggaleun sholat Shubuh. Nu kitu teh jalma nu teu puguh.

Barang datang waktu lohor bapa-bapa kalahka molor, tuh tinggaleun sholat lohor. Nu kitu teh jalma na kudu ditakol.

Barang datang waktu ashar ibu-ibu kalahka pasar, tuh tinggaleun sholat ashar. Nu kitu teh jalma ka sasar.

Barang datang waktu maghrib para pamuda kalahka gudag-gidig, tuh tinggaleun sholat maghrib. Nu kitu teh anak na jurig.

Barang datang waktu isya para gadis kalahka ngagaya, tuh tinggaleun sholat isya. Nu kitu teh incu na kuya.

Naha cenah meni kedah-kedah teing urang ngadegkeun sholat teh? Naha teu kenging izin heula sadinten mah? Atanapi sholat na di rapelkeun saminggoneun supados salse? Tetep teu tiasa para wargi sadayana, kedah sawaktos-swaktos sesuai sareng parentah ti gusti Allah taala, sakumaha dauhannana dina QS. An-Nisa: 103

اِنَّ الصَّلَاةَ كَانَتْ عَلَى الْمُؤْمِنِيِنَ كِتَابًا مَّوْقُوْتًا  ( النِّسَاء : ١٠٣(

Hartosna:

“... Sayaktosna sholat teh eta kawajiban jalma nu arariman anu tos tangtos waktosna.”

Teras kangge naon atuh urang sadayana ngalakonan sholat teh meni dugi ka teu kenging kalangkung sanajan sadinten oge?

1. Supados urang ngaraos tentrem manah. Sakumaha pidauh Allah SWT:

اَقِمِ الصَّلَاةَ لِذِكْرِ اللهِ اَلَا بِذِكْرِ اللهِ تَطْمَئِنُّ الْقُلُوْب

Hartosna:

“ Pek adegkeun sholat pikeun eling ka Kami, sing inget ari eling ka Allah teh eta tiasa nentremkeun manah.”

2. Supados urang janten jalmi anu tiasa ngaraksa tina padamelan/perbuatan anu awon jeung nu matak ngarugikeun, boh kana diri nyalira atanapi ka nu snesna. Sakumaha pidauh Allah SWT:

إِنَّ الصَّلَاةَ تَنْهٰى عَنِ الْفَحْشَاءِ وَالْمُنْكَرِ ...

            Hartosna;

“ Sayaktosna ari sholat teh eta bisa nyegah tina perbuatan keji jeung mungkar...”

Santriyin miwah santriyat rohimakumulloh, alhasil bilamana beres perkara ibadahna tegesnya ibadah sholatna, maka beres oge ibadah anu sejen na. Oge urang sadayana pasti kalebetkeun jalmi anu Taqwa, taat ka Allah sarta janten ahli surga na Allah. Aamiin yaa Allah Yaa Robbal ‘Aalamiin.

Alhamdulillah, rupina mung sakitu wae nu tiasa ka pihatur ku abdi, mudah-mudahan naon wae nu didugikeun ngajantenkeun elmu nu manfaat khususna kangge diri pribadi umumna kangge urang sadayana. Hapunten bilih aya kecap nu teu merenah dina manah nu matak raheut kana manah, sih dihapunten nu kasuhun.

Meser pecin meser bawang

Reujeung peuteuy tilu papan

Aduh isin teteh sareng akang

Geulis-kasep bari tara netepan

Pak Amat miara kuya

Digedengeun tangkal nangka

Omat ulah ngagugulung dunya

Di akherat bisi cilaka

وَاللّٰهُ الْمُوَفِق اِلٰى اَقْوَامِ الطَّارِق. اِلَى اللِّقَاء فِيْ اَقْوَامِ السَّلَامَة

وَاَخِيْرًا اُنْظُرْ مَا قَالَ وَلَا تَنْظُرْ مَنْ قَالَ.  وَالسَّلَامُ عَلَيْكُمْ وَرَحْمَةُ اللّٰهِ وَبَرَكَاتُه